GRACIAS A TOD@S!

As “III Xornadas de Consumo Responsable” organizadas a semana pasada en Salceda de Caselas (12-17 outubro) son interpretadas como éxito rotundo tanto pola organización coma polos asistentes.

Proxección de documentais, degustación de produtos, obradoiros, visitas guiadas e conferencias foron os pratos fortes que volveron colocar o espírito ecoloxista en primeira plana da vida cultural da localidade.

O traballo en cooperación entre asociacións, produtores particulares e institucións é unha das claves de éxito. Este ano a organización invitou ás asociacións Amigos da Terra, Verdegaia, Caleidoskopio; á produtora de agricultura ecolóxica Aghata Broeshamp e ao grupo de investigación GIEEA da Universidade de Vigo.

A organización das xornadas (A.C.D.E. TREZE-CATORZE) destaca o compromiso e o espírito de participación dos asistentes, a correcta dimensión do evento e demostra unha vez máis que se poden facer grandes cousas cun orzamento moi reducido.

Malia o relativo triunfo conseguido as mozas e os mozos da TREZE-CATORZE non pensan deterse pois o reto de implicar á maioría do pobo no consumo responsable está moi lonxe de conseguir. A parella "éxito e desafío", semella ser a garantía de supervivencia destas xornadas.

Moitas gracias a todos os colaboradores e os asistentes que facedes que isto sexa posible.

Vémonos o ano que ven!

A.C.D.E. Treze Catorze

CONCIENCIA ECOLÓXICA, III Xornadas de Consumo Responsable

Un ano máis, a Asociación C.D.E. Treze Catorze ten o pracer de organizar as III Xornadas de Consumo Responsable. Este ano a programación comeza o martes 12 de octubre coa proxección do primeiro documental e rematará o domingo 17.
Como cada ano, estades invitados a pasar connosco un fin de semana de CONcienciación tan importante nos tempos que corren.

III Limpeza do Río Caselas

Despois dos éxitos de anos anteriores das xornadas de limpeza simultánea en ríos de toda Galicia, repítese a experiencia o vindeiro domingo 3 de outubro. Este ano volve a ser a Asociación Cultural, Deportiva e Ecoloxista Treze Catorze a que organiza a Limpeza do Río Caselas en Salceda de Caselas en colaboración con ADEGA e o Proxecto Ríos. Estas xornadas están incluídas na III Limpeza Simultánea de Ríos que ADEGA organiza en toda Galicia e que conta coa colaboración de 22 institucións doutros tantos concellos.

Un dos problemas máis agravantes que sofren os nosos ríos segue a ser a gran cantidade de lixo que aparece nos cauces e ribeiras. Sobor de todo plásticos e entullos, elementos case habituais nos cursos fluviais e en moitos dos nosos montes. Dende a Asociación Treze Catorze e o Proxecto Ríos queremos concienciar á sociedade da necesidade de manter limpos os nosos ríos como premisa para a conservación da súa saúde. A limpeza non pasa só por ser unha actividade illada dun día de retirada de lixo. Para a conservación dos ecosistemas fluviais cómpre desenvolver actitudes responsables cara o medio natural e depende de todos/as frear a contaminación que están a sufrir os ríos. O coidado e o respecto polo entorno farían innecesarias nun futuro actividades como esta.

A Asociación Treze Catorze e o Proxecto Ríos entregarán aos grupos participantes un protocolo para difundir a limpeza ecolóxica e respectuosa dos ecosistemas fluviais, ademais de editar cartaces divulgativos para cada zona cun teléfono de contacto para que se apunten as persoas que queiran participar.

Nesta xornada a implicación do concello é fundamental para garantir a recollida do lixo que se saque dos ríos, para proporcionar o material necesario para a limpeza e para asegurar aos voluntarios/as participantes. O pasado ano retirouse un total de 11.020 toneladas de lixo (estimados) en toda Galicia e aproximadamente uns 120 Kg. en Salceda, de orixe diverso e incluso variopinto (neveiras, rodas, radiografías, colchóns...) Neste ano animamos aos participantes a pesar o lixo retirado e a difundir no propio concello a idea de que o río non é un vertedoiro.

As persoas que queiran participar nesta actividade deberán anotarse previamente chamando ao teléfono do coordinador da Asociación (Fran 615421199) ou email (trezecatorze@gmail.com) para confirmar a asistencia. A hora de saída será as 10.30 horas do domingo 3 de outubro na Praza do Concello de Salceda de Caselas.